Mediasiya Şurası və Bakı 23 saylı mediasiya təşkilatı tərəfindən Bakı Slavyan Universiteti tələbələri üçün seminar keçirilib.

3 mart 2026-cı il tarixində Mediasiya Şurasının təşkilatçılığı ilə Bakı 23 Saylı mediasiya təşkilatı tərəfindən Bakı Slavyan Universiteti tələbələri üçün "Mediasiya üstünlükləri” mövzusunda maarifləndirici seminar təşkil olunub.

Tədbiri giriş sözü ilə açan Bakı 23 saylı mediasiya təşkilatının təsisçisi Esmira Rzayeva mediasiyanın mübahisələrin məhkəmədənkənar həlli üsulu olduğunu vurğulayıb. Bildirib ki, Prezident İlham Əliyevin sərəncamı ilə təsdiq olunmuş “Mediasiya haqqında” Azərbaycan Respublikasının Qanununa əsasən Mediasiya Şurası və mediasiya təşkilatları ailə, əmək, inzibati, kommersiya və mülki münasibətlərdən irəli gələn mübahisələrin həllində mühüm rol oynayır.

Daha sonra Mediasiya Şurasının üzvləri, Bakı 23 saylı mediasiya təşkilatının mediatorları Cəlal Hüseynov və Toğrul İsgəndərov çıxış edərək, mediasiyanın yalnız hüquqi prosedur deyil, həm də sivil razılaşma və dialoq mədəniyyəti olduğunu diqqətə çatdırıblar. Qonaqlar mediasiya prosesinin üstünlükləri, tərəflər arasında qarşılıqlı anlaşmanın formalaşdırılması və mübahisələrin məhkəməyə müraciət etmədən həlli imkanları barədə ətraflı məlumat veriblər.

Sonda iştirakçıların sualları cavablandırılıb.