Bakı şəhəri, Süleyman Rəhimov küçəsi 167 ünvanında yaşayan sakinlər binanın mövcud vəziyyəti ilə bağlı ciddi narahatlıq ifadə edirlər. Sakinlərin sözlərinə görə, bir müddət əvvəl Şəhərsalma qurumlarının nümayəndələri əraziyə gələrək evləri ölçüb, çıxarış sənədlərini yoxlayıblar və binanın 1-2 ay ərzində söküləcəyini bildiriblər.

Lakin sakinlərin gözləntisinin əksinə olaraq, iddia edilir ki, söküntü prosesi başlamayıb, əvəzində binanın fasadında təmir işləri aparılmağa başlanılıb. Sakinlər bildirirlər ki, binanın daxilində uçqun, dağılma və təhlükəli vəziyyət olduğu halda, yalnız fasadın yenilənməsi “üstü bəzək, altı təzək” görüntüsü yaradır.

Şikayətdə qeyd olunur ki, fövqəladə vəziyyət ağır olduğu halda, Mədəniyyət Nazirliyinin bu istiqamətdə keçirdiyi tenderin mahiyyəti ciddi suallar doğurur. Əgər bina həqiqətən söküləcəksə, həmin binanın fasadına böyük vəsaitlərin xərclənməsi nə dərəcədə əsaslıdır?
Sakinlər sual edirlər:
Söküləcəyi deyilən binalara milyonlarla manat vəsait niyə xərclənir? Bu, büdcə vəsaitlərinin səmərəsiz xərclənməsi deyilmi?
Vətəndaşların iddiasına görə, insanlar öz mənzillərində qorxu içində yaşayır, binanın daxili hissəsi təhlükə yaradır, lakin aidiyyəti qurumlar problemin kökünə deyil, görüntüyə yönəlik işlərə üstünlük verirlər.

BNTV.az olaraq bildiririk ki, Şamil Əzizbəyov küçəsində müşahidə olunan oxşar problem indi Süleyman Rəhimov 167 ünvanında da sakinlərin narazılığına səbəb olub.

Aidiyyəti qurumlardan soruşuruq:

1. Süleyman Rəhimov 167 ünvanındakı binanın texniki vəziyyəti rəsmi olaraq yoxlanılıbmı?
2. Bina söküləcəkdisə, fasad təmirinə vəsait ayrılmasının hüquqi və iqtisadi əsası nədir?
3. Sakinlərin təhlükəsizliyi ilə bağlı hansı tədbirlər görülüb?
4. Mədəniyyət Nazirliyinin keçirdiyi tender konkret olaraq hansı işləri əhatə edir?
5. Fövqəladə Hallar Nazirliyi həmin binanın qəzalı olub-olmaması ilə bağlı rəy veribmi?

Mövzu ilə bağlı Mədəniyyət Nazirliyi, Dövlət Şəhərsalma və Arxitektura Komitəsi, Bakı Şəhər İcra Hakimiyyəti və Fövqəladə Hallar Nazirliyinin mövqeyini dərc etməyə hazırıq.