Yəqin ən xeyirxah əməllərdən biri də kiminsə evinə ruzi aparmasına vəsilə olub, kiminsə çörəyinin baisinə çevrilməməkdir. Hər kəsin ruzisini Allah verir, bir də öz əməyi sayəsində qazanır.
İnsanların yaxşı şəraitdə yaşamasını, maddi baxımdan təmin olunmasını həmişə arzulamışam. Amma nədənsə çox vaxt mənim ruzimə göz dikib, işimə mane olublar. Buna təəccüblənmirəm də...
TEREF yazır ki, bunu Abdulla Şaiq adına Azərbaycan Dövlət Kukla Teatrının rejissoru Saida Hagverdiyeva yazır.Daha sonra Səidə xanım yazır:
Baş verən hadisələrdən xəbərdarsınız. Qısası, mənim ixtisasım üzrə işləmədiyimi əlində rəhbər tutub, tutduğum vəzifədən ayrılmağımı ciddi cəhdlə tələb edən Mədəniyyət Nazirliyinin sektor müdiri Böyükxanım Talıbovanın bacısı Sona Talıbova Akademik Musiqili Teatrında çalışırmış. Özü də ən starateji vəzifədə, ən yüksək əməkhaqqı ilə. Düzdür, çalışa bilər. Burada qəbahət yoxdur. Öyrəndiyimə görə S. Talıbova indiki Azərbaycan Dövlət Mədəniyyət və İncəsənət Universitetinin mədəni-maarif işinin təşkili ixtisasından məzundur. Təhsilini başa vurduqdan sonra 35 il heç bir yerdə işləməyən bu xanım, nə hikmətdirsə, bacısı B. Talıbova Mədəniyyət Nazirliyinin teatr sektoruna müdir təyin olunan kimi vacib kadra çevrildi. Beləcə, Akademik Musiqili Teatrın starateji baxımdan ən yüksək postuna (Prodüser şöbəsinin meneceri) gətirilib.
Bilirsiniz ki, menecer ixtisası yerli və beynəlxalq əməkdaşlıq baxımından vacib postdur. Bunun üçün sənin bilik və bacarığından savayı, həm də geniş əlaqə və təcrübən olmalıdır. Heç olmasa teatr sahəsində. Hələ, idarəetməni demirəm.
Teatr meneceri kimdir? Özüm bu ixtisas üzrə ölkə xaricində təhsil aldığım üçün təsnifatını təxmini verəcəm.
Teatr meneceri teatrın bütün yaradıcı, inzibati və təşkilati proseslərini idarə edən şəxsdir. O, həm sənət adamları ilə işləyir, həm büdcəni, reklamı, tamaşa cədvəllərini, həm də tamaşaçı ilə teatr arasındakı əlaqəni qurur. Bu, öz yerində.
Yaxşı, teatr meneceri ilə mədəni-maarif işçisi arasındakı fərq hansılardlr?
Teatr meneceri – konkret bir təşkilatı (teatrı) idarə edir. Məqsəd: tamaşaların uğuru, teatrın inkişafı, tamaşaçı auditoriyasının artması.
Mədəni-maarif işçisi – sosial-mədəni sahəyə xidmət edir- (klublar, mərkəzlər, tədbirlər). Məqsəd: maarifləndirmə, mədəniyyətin təbliği.
Gəldik əsas məsələyə. Hörmətli Böyükxanım xanım, demək ki, yaxın qohum olaraq eyni sistemdə, hətta ümumi rəhbərliyiniz altında çalışmaq olar. Yəni, məsələ və ona münasibət fərdlərə görə dəyişir?! Xülasə “Yetimin əlində qoğal əcaib görünür”...
Saida Hagverdiyeva
TEREF