Bu gün – Azərbaycanlıların Soyqırımı Günü münasibətilə xalqımıza qarşı törədilmiş dəhşətli hadisələrdən 108 il ötür. 1918-ci ilin martında baş verən qanlı qırğınlar tariximizin ən faciəli səhifələrindən biri kimi yadda qalıb.

Gənc nəslin tarixi yaddaşının möhkəmləndirilməsi və milli faciələrimiz haqqında daha dolğun məlumatlandırılması məqsədilə Azərbaycan Milli Elmlər Akademiyası-nın Mərkəzi Elmi Kitabxanasında (MEK) xüsusi sərgi təşkil olunub.

Sərgidə 1918-ci il mart hadisələri zamanı xalqımıza qarşı törədilmiş soyqırımı faktlarını əks etdirən zəngin materiallar nümayiş etdirilir. Buraya müxtəlif nəşrlər, arxiv sənədləri və elmi araşdırmalar daxildir.

Nümayiş olunan əsərlər sırasında “Azərbaycanlıların soyqırımı: tarixin qanlı salnaməsi”, “Azərbaycan və Şərqi Anadoluda türk-müsəlman əhaliyə qarşı soyqırımları (1914–1920-ci illər)” II beynəlxalq elmi konfransın materialları, “Azərbaycanda erməni-daşnak terrorunun xronologiyası”, “Soyqırımlar xalq yaddaşında”, “Soyqırım cinayəti (beynəlxalq aktlar, normativ sənədlər, müraciətlər və şərhlər toplusu)”, “Soyqırımı tarixinin dastanı” və digər dəyərli mənbələr yer alır.

Sərgidə təqdim olunan materiallar Azərbaycanın müxtəlif bölgələrində baş vermiş qırğınların miqyasını, faktlarını və tarixi reallıqları əks etdirir. Eyni zamanda, yerli və xarici tədqiqatçıların araşdırmaları vasitəsilə bu hadisələrə beynəlxalq baxış da təqdim olunur.

Qeyd edək ki, sərgidə nümayiş olunan nəşrlərin elektron versiyaları oxucular üçün kitabxananın rəsmi saytı vasitəsilə də əlçatandır. Bu isə tarixi həqiqətlərin daha geniş auditoriyaya çatdırılması baxımından mühüm əhəmiyyət daşıyır.