Aqrar Universitet ətrafında ciddi iddialar: ziyalılar Prezidentə MÜRACİƏT etdi
Azərbaycan Dövlət Aqrar Universitetində baş verənlərlə bağlı narahatedici iddialar gündəmə gəlib. Aqrar sahənin bir qrup ziyalısı məsələ ilə əlaqədar Azərbaycan Prezidenti İlham Əliyev-ə müraciət ünvanlayıb.
BNTV.az-a Müraciətdə qeyd olunur ki, dövlət başçısının aqrar sahəyə göstərdiyi diqqət və qayğı hər zaman bu sahədə çalışanlar üçün mühüm stimul olub. Lakin iddiaya görə, Azərbaycan Dövlət Aqrar Universitetinin rektoru Zəfər Qurbanov rəhbərliyi dövründə təhsil müəssisəsində ciddi idarəetmə problemləri yaranıb.
Ziyalıların bildirdiyinə görə, universitetdə kadr siyasəti qeyri-şəffaf şəkildə aparılıb, vəzifələrə təyinat zamanı peşəkarlıqdan çox şəxsi münasibətlərə üstünlük verilib. Həmçinin, bəzi hallarda vəzifələrin qeyri-rəsmi ödənişlər müqabilində verildiyi iddia olunur.
Müraciətdə daha bir diqqətçəkən məqam maliyyə pozuntuları ilə bağlıdır. Belə ki, 2025-ci ildə Azərbaycan Respublikasının Baş Prokurorluğu-nun təqdimatı əsasında Maliyyə Nazirliyi tərəfindən aparılmış yoxlamalar zamanı ciddi nöqsanlar və yeyinti faktlarının aşkar edildiyi vurğulanır. Bildirilir ki, bu faktlar üzrə Gəncə şəhər prokurorluğunda Cinayət Məcəlləsinin 179.2.3 və 179.2.4-cü maddələri ilə cinayət işi başlanıb və hazırda iş Korrupsiyaya Qarşı Mübarizə Baş İdarəsi tərəfindən araşdırılır. Eyni zamanda Hesablama Palatası-nın universitetdə yoxlamalarının davam etdiyi qeyd edilir.
Bununla belə, müraciət müəllifləri bildirirlər ki, Məcnun Məmmədov tərəfindən 11 mart 2026-cı il tarixində imzalanmış əmrə əsasən, elmi-tədqiqat institutlarının birləşdirilməsi üzrə yaradılmış İşçi Qrupuna rəhbərlik məhz Zəfər Qurbanova həvalə olunub. Bu qərarın isə aqrar ictimaiyyət arasında ciddi narahatlıq doğurduğu vurğulanır.
Ziyalılar hesab edirlər ki, aqrar sahə üzrə yetərli elmi və praktiki təcrübəyə malik olmadığı iddia edilən, üstəlik barəsində cinayət işi aparılan bir şəxsin belə mühüm prosesə rəhbərlik etməsi düzgün deyil və elmi əsaslı qərarların qəbuluna mənfi təsir göstərə bilər.
Müraciətdə həmçinin sual olunur ki, barəsində cinayət işi olan bir şəxsin yüksək vəzifələrə təyin olunmasına hansı əsaslarla şərait yaradılıb.
Sonda müraciət müəllifləri Prezidentdən qeyd olunan məsələlərin obyektiv araşdırılmasını və Azərbaycan Dövlət Aqrar Universitetində yaranmış vəziyyətlə bağlı müvafiq tədbirlərin görülməsini xahiş edirlər.
Qeyd edək ki, məsələ ilə bağlı qarşı tərəfin mövqeyini dərc etməyə hazırıq.
Müraciəti olduğu kimidə sizə təqdim edirik:
Sizin aqrar sahəyə və Azərbaycan Dövlət Aqrar Universitetinə göstərdiyiniz diqqət və qayğı aqrar sahənin inkişafı üçün çalışan elmi işçilər, professor-müəllim heyəti üçün hər zaman qürur mənbəyi olmuşdur.
Etimad göstərərək Azərbaycan Dövlət Aqrar Universitetinə rektor təyin etdiyiniz Zəfər Qurbanov, təyin olunduğu gündən bu günə qədər aqrar təhsil ocağının idarə olunmasında ciddi nöqsanlara yol vermişdir. Universitetdə nə kadr islahatları düzgün aparılmış, nə də təhsil müəssisəsinin maddi-texniki bazası qorunub saxlanılmışdır. Əksinə, mövcud resursların şəxsi maraqlar naminə istifadəsi və mənimsənilməsi halları müşahidə olunmaqdadır.
Vəzifələrə təyin olunan şəxslərin əksəriyyəti ya şəxsi yaxınlıq əsasında seçilmiş, ya da vakant vəzifələrə qeyri-rəsmi ödənişlər müqabilində təyinatlar həyata keçirilmişdir. Bununla belə, rektor Zəfər Qurbanov çıxışlarında fəaliyyətinin guya “təmiz və şəffaf” olduğunu bildirir.
Lakin, 2025-ci ildə Baş Prokurorluğun təqdimatı əsasında Maliyyə Nazirliyinin yoxlama komissiyası tərəfindən aparılmış araşdırmalar zamanı ciddi maliyyə pozuntuları və yeyintilər aşkar edilmişdir. Bu faktlara əsasən, Gəncə şəhər Prokurorluğu tərəfindən Azərbaycan Respublikası Cinayət Məcəlləsinin 179.2.3 və 179.2.4-cü maddələri ilə cinayət işi başlanmışdır.Hazırda həmin cinayyət işi baş prokurorluğun korrupsiyaya qarşı mübarizə baş idarəsinə göndərilmişdir. Hal–hazırda hesablama palatasının müfəttişləri Aqrar Universitetdə yoxlamadadırlar
Buna baxmayaraq, Kənd Təsərrüfatı naziri Məcnun Məmmədov tərəfindən 11 mart 2026-cı il tarixində, Azərbaycan Respublikası Prezidentinin 20 fevral 2026-cı il tarixli 599 nömrəli Fərmanının icrasının təmin edilməsi məqsədilə elmi tədqiqat isititutlarının birləşdirilməsi məsələlərinin həlli üzrə İşçi Qrupunun yaradılması barədə əmr imzalanmış və həmin İşçi Qrupuna rəhbərlik nədənsə Aqrar sahədən anlayışı olmayan Zəfər Qurbanova həvalə edilmişdir.
Haqqında cinayət işi açılmış və aqrar sahə üzrə yetərli elmi-təcrübi biliklərə malik olmayan bir şəxsin belə məsul komisyaya sədr təyin edilməsi, Elmi Tədqiqat İnstitutlarının birləşdirilməsi prosesinin elmi əsaslardan uzaq şəkildə həyata keçiriləcəyi ilə bağlı ciddi narahatlıq doğurur. Rektor Zəfər Qurbanovun nə aqrar elm, nə də aqrar tədqiqat sahəsində yetərli bilik və təcrübəyə malik olmadığı açıq şəkildə hiss olunmaqdadır.
Aqrar sahədən və elmdən uzaq şəxslərin rəhbər vəzifələrdə təmsil olunması bu sahənin inkişafına mənfi təsir göstərməkdə və onun tənəzzülünə səbəb olmaqdadır. Bu baxımdan, belə bir şəxsin mühüm qərarların qəbulunda iştirak etməsi məqsədəuyğun hesab edilmir.
Eyni zamanda sual doğurur ki, haqqında cinayət işi açıldığı halda, Zəfər Qurbanovun belə vəzifələrə təyin olunmasına necə şərait yaradılmışdır və bu təyinat hansı əsaslara söykənir.
Cənab Prezident,
İnanırıq ki, aqrar sahənin ziyalıları olaraq etdiyimiz bu müraciəti nəzərə alacaq, qeyd olunan halların obyektiv araşdırılmasını təmin edəcək və müvafiq tədbirlərin görülməsi istiqamətində tapşırıqlar verəcəksiniz. Sizə əlavə olaraq bildirmək istəyirik ki, Z. Qurbanov (Neft mütəxəsisi) Respublikada yeganə kadr hazırlayan tədris ocağı özünün tənəzzül dövrünü yaşayır. O gələndən bəri universitetdə təhsil və tədris prosesi çökübdür. Ona görə də, Universitet barədə təcili tədbir görmək lazımdır.
HÖRMƏTLƏ: Aqrar sahənin ziyalıları
Göndərən, N.Əliyev
Əlaqə whatsapp:+994 70 402 02 85
BakuNews.az
