Finlandiyanın paytaxtı Helsinkidə Azərbaycanın Zəfər və Bayraq günlərinə həsr olunmuş təntənəli tədbir keçirilib.
Helsinkidə fəaliyyət göstərən Azərbaycan Evinin təşkilatçılığı və Azərbaycanın İsveçdəki səfirliyinin dəstəyi ilə “Musiikkitalo” müasir musiqi kompleksində baş tutan tədbirdə Azərbaycan, Türkiyə səfirliklərinin və Şimali Kipr Türk Respublikasının diplomatik nümayəndəliyinin müşavirləri, soydaşlarımız, yerli
ictimaiyyətin və dost icmaların nümayəndələri iştirak ediblər. Azərbaycanın Dövlət Himninin səsləndirilməsi ilə başlayan tədbirdə ölkəmizin ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib.
Tədbir iştirakçılarını salamlayan Helsinki Azərbaycan Evinin rəhbəri, Skandinaviya Azərbaycanlıları Koordinasiya Şurasının Finlandiya üzrə koordinatoru, “Azər-Türk” Gənclər Təşkilatının sədri Ülviyyə Cabbarova tarixi bayramlar münasibətilə soydaşlarımızı və qonaqları təbrik edib, Azərbaycanın
dövlət müstəqilliyinin bərpasının 32-ci ilində ilk dəfə bu bayramın ölkəmizin suverenliyinin tam bərpa olunduğu şəraitdə qeyd edildiyini xatırladıb.
Tədbirdə çıxış edən Azərbaycanın İsveçdəki səfirliyinin müşaviri Cavanşir Məmmədov ölkəmizin dövlətçilik və hərb tarixinə qızıl hərflərlə həkk olunmuş
Zəfər Günü münasibətilə soydaşlarımızı təbrik edib. Qarabağ Zəfərinə aparan yolun başlanğıcının müasir Azərbaycan dövlətinin qurucusu, ümummilli lider Heydər Əliyev tərəfindən qoyulduğunu, Prezident İlham Əliyevin bu işi məntiqi sonluğa çatdırdığını vurğulayıb, Xankəndinin mərkəzi meydanında Zəfər Gününün 3-cü ildönümünə həsr olunmuş hərbi paradın keçirilməsini qürurverici mühüm hadisə adllandırıb. Sonra Zəfər və Bayraq günlərinə həsr olunmuş sənədli film nümayiş etdirilib. Bədii hissədə Azərbaycanın əməkdar artisti Rəşad İlyasov və Helsinki Azərbaycan Evinin nəzdindəki Azərbaycan həftəsonu məktəbinin şagirdlərinin ifasında Azərbaycan bəstəkarlarının mahnıları təqdim olunub. Rəşad İlyasov xarici ölkələrdə belə tədbirlərin təşkilinə görə Diasporla İş üzrə Dövlət Komitəsinə və Azərbaycanın İsveçdəki səfirliyinə minnətdarlığını bildirib.