Paytaxt sakini Sevda Abuzərli sosial şəbəkədə paylaşdığı statusla Bərdə Rayon Mərkəzi Xəstəxanası ilə bağlı narazılığını dilə gətirib.

O bildirib ki, səhhəti pisləşdiyi üçün xəstəxananın təcili yardım şöbəsinə müraciət etsə də, təxminən bir saat gözləməli olub və bu müddətdə ona heç bir tibbi müdaxilə edilməyib.

Sevda Abuzərli paylaşımında yazıb:

"Bərdəyə qonaq gəlmişdim, halım pisləşdi, Bərdə Rayon Mərkəzi Xəstəxanasına getdim. Acildə 1 saata yaxın gözləməli oldum. Nə həkim, nə də tibb bacılarından heç kim heç bir müdaxilə etmədi. Səbəb isə həkim və tibb bacılarının digər xəstələrə baxması idi. Xəstə çox, həkim isə təkdir."

Paytaxt sakini daha sonra xəstəxana rəhbərliyi ilə görüşmək istədiyini, lakin bunun mümkün olmadığını qeyd edib:

"Direktor və ya direktor müavinləri ilə görüşmək istədiyimi bildirdim. Dedilər ki, direktorun və müavinlərin qəbul günü var, onda gələrsiniz. Mən də Bakıya qayıtmalı oldum."

Onun sözlərinə görə, xəstəxanada həm tibbi personal çatışmazlığı, həm də vətəndaş müraciətlərinin operativ şəkildə dinlənilməsi ilə bağlı problemlər mövcuddur.

Qeyd edək ki, məsələ ilə bağlı xəstəxana rəhbərliyi və ya TƏBİB tərəfindən hələlik rəsmi açıqlama verilməyib.